तस्विर : नमो अनलाईन
विराटनगर । भारतीय ग्राहकलाई लक्षित गरेर सञ्चालन गरिने क्यासिनोमा नेपाली नागरिकको प्रवेश प्रतिबन्ध छ ।
तर, विराटनगरका क्यासिनो भने नेपालीले नै भरिभराउ हुनेगरेका छन् ।
जुवाजन्य खेल खेलाइने क्यासिनोमा नेपालीहरूको प्रवेश खुला रहेको पछिल्लो एक घटनाले पनि प्रष्ट पार्छ ।
गत शुक्रबार मध्यराति रत्ना होटलमा रहेको सम्राट क्यासिनो बाहिर दुई नेपाली युवाबीच खुकुरी हानाहान भएको थियो ।
सम्राटमा जुवा खेलेर बाहिर निस्किएका विराटनगर–११ का ३१ वर्षीय रोनाल कँडेलमाथि खुकुरी प्रहार भएको हो ।
खुकुरीले लागेर कँडेलको टाउकोमा १२ टाँका लगाइएको छ भने देब्रे कानमा पाँच टाँका लगाइएको छ ।
उनीमाथि खुकुरी प्रहार गर्ने झापाको घैलाडुब्बा घर भइ विराटनगर–८ मा बस्दै आएका ३८ वर्षीय विक्रम थपलियालाई प्रहरीले पक्राउ गरेको छ ।
उनीविरुद्ध ज्यान मार्ने उद्योगको मुद्दा चलाउन अदालतबाट म्याद थप गरिएको जिल्ला प्रहरी कार्यालय मोरङका प्रहरी निरीषक हेमराज ओलीले जानकारी दिए ।
उनका अनुसार कँडेलकी पत्नीले दिएको किटानी जाहेरीका आधारमा थपलियाविरुद्ध मुद्दा चलाउन आइतबार अदालतबाट म्याद थप गरेर घटना अनुसन्धानको बाँकी प्रक्रिया अघि बढाइएको हो ।
‘घटनामा संलग्न केही मान्छे फरार छन्,’ उनले भने, ‘घटनास्थलका फुटेजहरू संकलन गरेर थप अनुसन्धान भइरहेको छ ।’
ओलीका अनुसार रोनाल र विक्रम साथी–साथी हुन् ।
सँगसँगै क्यासिनो छिरेका उनीहरूबीच पैसा हारमारको विषयमा विवाद सुरु भएको खुलेको उनको भनाइ छ ।
क्यासिनोका बाउन्सरले उनीहरूलाई बाहिर निकालेपछि उक्त विवाद खुकुरी हानाहानमा परिणत भएको थियो ।
जसमा घाइते बनेका कँडेल उपचारपछि घर फर्किएका छन् भने थपलियामाथि मोरङ अदालतबाट म्याद थप गरेर प्रहरीले अनुसन्धान गरिरहेको छ ।
यता, यो घटनामा क्यासिनो दोषी रहेको भन्दै गिरि फाउन्डेसनको अगुवाईमा स्वतन्त्र युवा समूह, विराटनगरलगायतले मोरङ प्रशासन र मोरङ प्रहरीलाई ज्ञापनपत्र बुझाएको छ ।
प्रहरीको मिलेमतोमा कानुनविपरीत नेपालीलाई क्यासिनोमा प्रवेश गराएपछि यस्तो परिस्थिति बनेको गिरि फाउन्डेसनका अध्यक्ष अभिषेक गिरिको ठहर छ ।
‘यदि, नेपालीले क्यासिनोमा प्रवेश पाउँथेनन् भने यो घटना हुने थिएन,’ गिरि भन्छन्, ‘यसैले पनि यो घटनाको मूल जड नै क्यासिनो हो । आफ्नो फाइदाका लागि केही व्यक्तिलाई मिलाएर कानुन उल्लंघन गरी उनीहरूले नेपालीलाई प्रवेश दिलाएका छन् । यसैले क्यासिनोलाई पनि कारबाही हुनुपर्छ भन्ने हाम्रो माग हो ।’
उसो त कँडेलमाथि खुकुरी प्रहार गर्ने थपलिया गिरिको संरक्षणमा रहेको आरोप छ ।
तर, गिरिले भने कँडेल र थपलिया दुवै आफू आबद्ध कांग्रेसनिकट रहेकाले आफ्नो नाम जोडिएको हुन सक्ने बताउँदै आफू यस विषयबाट अलग रहेको सुनाए ।
‘मेरो नाम जोडेर दुष्प्रचार भइरहेको छ,’ उनले भने, ‘दुवै जना नेपाली कांग्रेसआबद्ध छन् । कांग्रेसका अरूसँग पनि मेरो चिनजान छ । उनीहरूले बाहिर झगडा गर्दा मेरो नाम जोड्नु गलत हो । मैले गर्दै गरेको सामाजिक काम असफल गराउन यसरी गलत हल्ला चलाइएको हो ।’
मोरङ प्रहरीले क्यासिनोमा जुवा खेल्न नेपालीले कसरी प्रवेश पाएभन्ने बारेमा पनि अनुसन्धान थालेको छ ।
नेपालीले क्यासिनोमा प्रवेश पाएको पुष्टि भएमा क्यासिनोमाथि पनि कारबाही हुने प्रहरीले जनाएको छ ।
‘अहिलेसम्म चाहिँ जिल्ला प्रहरी र वडा प्रहरीको टोलीले आकस्मिक र नियमित अनुगमन जारी राखेका छौं,’ ओलीले भने, ‘नेपालीले प्रवेश पाएको हालसम्म देखिएको थिएन । छानबिन गर्दा दोषी देखिएमा क्यासिनोलाई पनि जुवाजन्य गतिविधिमा कारबाही गर्छौं ।’
रत्ना होटलमा सञ्चालित ‘सम्राट’ र बिग होटलमा सञ्चालित ‘च्याम्पियन जोन’ गरी विराटनगरमा अहिले दुई क्यासिनो सञ्चालनमा छन् ।
प्रहरी प्रशासनकै मिलेमतोमा सञ्चालकले खुलेआम नेपालीलाई क्यासिनोमा जुवा खेलाउने गरेको आक्षेप लाग्ने गरेको छ ।
नेपालीको प्रवेशलाई ‘नजरअन्दाज’ गर्नका लागि सञ्चालकले प्रहरीमाथि मोटो रकम खर्चिने गरेको आरोप छ ।
यो विषयमा एकपटक ‘हेलो सरकार’ समक्ष उजुरी परेको थियो भने एकपटक विराटनगर महानगरपालिकाले अनुगमनसमेत गरेको थियो ।
तर पनि विराटनगरका क्यासिनोमा नेपालीको प्रवेश रोकिन सकेको छैन ।
प्रहरी, नेपाली ग्राहक र सञ्चालकबीच समन्वयात्मक भूमिका बनाउन सम्राट क्यासिनोका सञ्चालकले एक जना पत्रकारलाई नै जागिर दिएको छ ।
विराटनगरलाई कार्यक्षेत्र बनाएर पत्रकारिता गरिरहेका ती पत्रकारले वर्षौंयता त्यहाँ काम गरिरहेका छन् ।
