तस्विर : नमो अनलाईन
विराटनगर । समाजसेवी अभिषेक गिरिले स्थापना गरेको गिरि फाउन्डेसन र पारस मल्टिस्पेसियालिटी हस्पिटलबीच निःशुल्क स्वास्थ्य शिविर गर्नका लागि सहकार्य हुने भएको छ ।
सोमबार पत्रकार सम्मेलनको आयोजना गरेर विराटनगर महानगरपालिका-११ महेन्द्र चोकस्थित पारस मल्टिस्पेसियालिटी अस्पताल र गिरि फाउन्डेसनले संयुक्त रूपमा शिविरको आयोजना गर्नेगरी सम्झौता गरे ।
पारस हस्पिटलसँग विभिन्न समयमा निःशुल्क रूपमा शिविरको आयोजना गर्नेगरी सम्झौता भएको फाउन्डेसनका अध्यक्ष गिरिको भनाइ छ ।
पछिल्लो समय समाजसेवामा सक्रिय रहेका गिरिले आफ्नो फाउन्डेसनमार्फत् नि:शुल्क स्वास्थ्य शिविर आयोजना गरी बिरामीहरूलाई सुलभ र सहज उपचार सेवा उपलब्ध गराउनका लागि सम्झौता भएको सुनाए ।
विपन्न वर्गका बिरामीले स्वास्थ्योपचार नपाइरहेको परिस्थितिलाई मध्यनजर गरेर स्वास्थ्य शिविर सञ्चालन गर्न आँटेको गिरिले जनाए ।
गिरिले भने, ‘कतिपय अहिले पनि स्वास्थ्यको पहुँचमा हुनुहुन्न । विपन्न वर्गका सबैलाई अस्पताल ल्याएर उपचार गराइदिन सकिरहेका छैनौं । त्यो सम्भव पनि छैन । तर उनीहरू सबैलाई समेटेर सहुलियत उपचार दिलाउने प्रयासस्वरूप स्वास्थ्य शिविर आयोजना गर्न खोजेका हौं ।’
गिरिका अनुसार पहिलो चरणमा विराटनगर महानगरपालिकाका १९ वटै वडामा स्वास्थ्य शिविरको आयोजना हुने छ ।
स्थानदेखि स्वास्थ्य सामग्रीमा लाग्ने खर्च व्यवस्थापनसम्म फाउन्डेसनले गर्नेछ भने चेकजाँच अस्पतालले गर्ने छ ।
यस्तै, अस्पतालका प्रबन्ध निर्देशक हेमनारायण मेहताले विशेषज्ञ चिकित्सकहरूबाट विभिन्न विभागको स्वास्थ्य शिविर सेवा सञ्चालन गर्नका लागि सम्झौता भएको सुनाए ।
स्वास्थ्य शिविरमा छनोट भएका बिरामीहरूलाई सम्पूर्ण उपचारमा २५ प्रतिशत छुट गर्ने, अपरेसनमा ५० प्रतिशत छुट गर्ने उनको भनाइ छ ।
स्वास्थ्य शिविरमा छनोट भएका बिरामीहरूलाई भर्ना गरेर उपचार वा अपरेसन गर्नुपरेमा औषधिमा १० प्रतिशत छुट गर्ने दुवै संस्थाको योजना छ ।
त्यसबाहेक अपरेसन शुल्क, बेड भर्ना शुल्क, मेडिसिन, डाक्टर राउन्ड, भर्ना शुल्क, प्याथोलोजीमा (सिबिसी, बिएसआर र सेरोलोजी), छातीको एक्सरे, मुटुको इसिजीबाहेक अन्य चेक गर्नु पर्ने अवस्थामा ५० प्रतिशत छुट हुने अस्पतालका बालरोग विशेषज्ञ सफिउर रहमानले जानकारी दिए ।
