तस्विर : नमो अनलाईन
विराटनगर । मुख्यमन्त्री केदार कार्कीले सरकार र व्यवसायी साझेदार नभई एक रथका दुई पाङ्ग्रा भएको बताएका छन् ।
नेपाल उद्योग बाणिज्य महासंघ कोशी प्रदेशको छैठौं प्रदेश सभामा उनले साझेदार छुटिएर जानसक्छ तर पाङ्ग्रा छुटिदा रथ चल्न नसके जस्तै सरकार र व्यवसायी रहेको बताएका हुन् ।
कर बिनाको सरकार चल्न सक्दैन, व्यवसायी डुब्यो भने सरकार चल्न सक्दैन, उनले भने, बैंक डुब्यो भने रोजगारी पाउने अबस्था हुँदैन त्यसैले कोशी सरकारले उद्योगी व्यवसायीलाई प्रोत्साहन गर्नका लागि योजना कार्यान्वयनमा ल्याउनै लागेको छ ।
महासंघको यो सभाले प्रदेशको दिगो विकासमा केन्द्रीत हुन्छ भन्नेमा विश्वस्त रहेको बताएका छन् । व्यवसाय गर्ने भन्दा नेता बढी भएको अबस्था छ, तपाईहरु की राजनीति गर्नुहोस् कि व्यवसाय, दुई तिर हातहाल्यो भने सफल हुईदैन् । व्यवसायको लागि दक्ष जनशक्तिको आवश्यक्ता रहेको हुँदा प्रदेश सरकारले महिला र युवालाई उद्यमी बनाउने अभियान चलाएको छ । प्रदेशको उद्यमशिलतालाई अगाडि बढाउन उद्योग दर्ता सम्बन्धी नियमावली ल्याएर अनलाइनबाट नै उद्योग दर्ता, नवीकरणलगायतको काम सुरू भइसकेको मुख्यमन्त्री कार्कीले बताएका हुन् ।
कानुन डर, त्रास देखाउने हतियार नभई सहजीकरण गर्ने माध्ययम भएकोले उद्योगी व्यवसायीहरूलाई नडराउन उनले आग्रह गरेका छन् । अर्काले गरेको देखी नसहने नेपाली समाजमा छिमेकीले नै छिमेकीको उन्नति, प्रगति देखि नसहने भएकाले पछि परेका छौं, उनले भने मजदुरका छोराछोरीले सधैं मजदुरी नै गरिदिनुपर्ने हो त ? श्रम सबै समान हुन्छ । श्रमको आधारमा कसैले कसैलाई विभेद गर्न पाउँदैन अनि मात्रै देश विकास हुन्छ । विराटनगरभन्दा काठ्माडौंमा बढी भएमा त्यहाँ आफ्नो श्रम बेच्छ, काठ्माडौं भन्दा कतारमा बढी भयो भने त्यहाँ जान्छ । कतारभन्दा अमेरिकामा बढी भएमा त्यहाँ बेच्छ । श्रम बेच्न त पाईन्छ होला नि ?
बिदेश गएका मानिसहरुलाई जनसम्पर्क मोर्चा बनाएर लेबी उठाई पार्टी चलाउने र फर्केपछि विमानस्थलमा विदेश जाँदै गरेको फोटो राखेर गाली गर्ने व्यवहारमा नेताहरूले परिवर्तन गर्नुको विकल्प नभएको मुख्यमन्त्री कार्कीले बताएका छन् ।
