१२ बैशाख २०८१, बुधबार
24-04-2024 , Wed
×

कोशी अस्पतालको नयाँ भवन अलपत्र: काम नगर्ने भूमि कन्स्ट्रक्सनकोे १६ करोड ग्यारेन्टी जफत

Logo
नमो संवाददाता प्रकाशित शुक्रबार, फाल्गुण ०४, २०८०

तस्विर : नमो अनलाईन

विराटनगर  । सम्झौता गरेको समयसीमाभित्र निर्माणको काम पूरा नगरी अलपत्र पारेर सम्र्पकविहीन भएको विराटनगरको एउटा निर्माण कम्पनीको साढे १६ करोडभन्दा बढी ग्यारेन्टी रकम जफत गरिएको छ ।

विराटनगरस्थित कोशी अस्पतालको भवन निर्माणको काम बीचमै छोडेर सम्पर्कविहीन भएकोे विराटनगरको भूमि–बी.आई. पी.एल.कन्स्ट्रक्सनको बैङ्क ग्यारेन्टी र पर्फर्मेन्स ग्यारेन्टी बापतको १६ करोड ८३ लाख ६६ हजार ५ सय रुपैयाँ जफत गरेको हो । निर्माण कम्पनीको उक्त रकम सहरी विकास तथा भवन निर्माण विभाग सङ्घीय आयोजना कार्यान्वयन एकाइ मोरङले जफत गरेको छ ।

रमन–भूमि, बी.आई.पी.एल. जेभीले संयुक्तरूपमा कोशी अस्पतालको सुविधा सम्पन्न पाँच तलाको भवन निर्माण गर्ने ठेक्का पाएको थियो । अस्पताल परिसरमा निर्माणाधीन भवनको सम्झौता अवधि सकिएको एक महिना हुन लाग्दा पनि साढे दुई वर्षमा ३० प्रतिशत मात्र निर्माणको काम पूरा भएको छ । अस्पतालको भवन निर्माणको सम्झौता २२ पुसमा सकिएको थियो । सम्झौता अवधि सकिँदासमेत निर्माणको काम आधा पनि नसकी अलपत्र छोडेर सर्म्पकविहीन भएको निर्माण कम्पनीले राखेको ६ करोड ५५ लाख रुपैयाँ बैङ्क ग्यारेन्टी १८ माघमा जफत गरेको थियो । एक हप्ताअगाडि आयोजना एकाइले पफर्मेन्स ग्यारेन्टी (पीबी) १० करोड २८ लाख ६६ हजार ५ सय रुपैयाँ पनि जफत गरेको सहरी विकास तथा भवन निर्माण विभाग सङ्घीय आयोजना कार्यान्वयन एकाइ मोरङका सूचना अधिकारी अशोक रामले जानकारी दिए । ‘सम्झौता गरेको समयसीमाभित्र निर्माण कम्पनीले काम नसकेपछि बैङ्क ग्यारेन्टी र पर्फर्मेन्स ग्यारेन्टी जफत गरिएको हो’ सूचना अधिकारी रामले भने, ‘अहिले जेबीमध्येकै रमण कन्स्ट्रक्सनले निर्माणको काम गर्दै आएको छ ।’

निर्माणको काम बीचैमा छाडेर भूमि कन्स्ट्रक्सन सम्पर्कविहीन भए । ठेकेदारले सम्झौताअनुसार काम नगरेको, लिखित, मौखिक ताकेता गर्दा बेवास्ता गरेपछि बैङ्क ग्यारेन्टी र पर्पmर्मेन्स ग्यारेन्टी जफत गरिएको हो । काम अलपत्र परेपछि आयोजनाले पटक–पटक पत्र पठाएर काम थाल्न अनुरोध गरे पनि कुनै सुनुवाइ नगरेपछि ठेक्का रद्द गरेर कारबाहीको तयारी गर्ने भएपछि जेबीमध्येका रमणले काम सुुरु गरेको छ । अहिलेसम्म ३० देखि ३५ प्रतिशत मात्र काम पूरा भएको इन्जिनियरसमेत रहेका सूचना अधिकारी रामले बताए । ‘भूमि–बी.आई.पी.एल.कन्स्ट्रक्सन सम्पर्कविहीन भएपछि केही महिना अगाडिदेखि जेबीमध्येका रमण कन्स्ट्रक्सनले काम सुरु गरेको छ’ उनले भने, ‘अहिले निर्माणको काम भइरहेको छ ।’

म्याद थपको तयारी
रमणले काम सुरु गरेपछि परियोजना एकाइले पहिलो पटक म्याद थप गर्ने तयारी गरिएको छ । कोशी अस्पतालको नयाँ भवन निर्माणको लागि एकाइले ५० करोड ३४ लाख ४४ हजार ७ सय १४ रुपैयाँमा टेण्डर खुलाएको थियो । रमन भूमि, बी.आई.पी.एल. जेभीले ३३ करोड २२ लाख ४८ हजार ९ सय ११ रुपैयाँ ३३ पैसामा ठेक्का लिएको थियो ।

उक्त जेभीले ठेक्का पाएपछि २०७८ असार २३ गते सङ्घीय आयोजना कार्यान्वयन एकाइसँग सम्झौता गरेपछि २१ असोजमा तत्कालीन स्वास्थ्य तथा जनसङ्ख्या राज्यमन्त्री उमेश श्रेष्ठलाई ल्याएर शिलान्यास गरिएको थियो ।

कोशीभित्र बन्दै आएको अत्याधुनिक सुविधा सम्पन्न पाँच तले भवन निर्माणको काममा भएको ठेकेदारभित्रको आन्तरिक विवाद र ढिलासुस्तीको कारण निर्माणमा ढिलो भएको छ । सुरुमा कृष्ण बोहरा सञ्चालक रहेको भूमि कन्स्ट्रक्सनले निर्माणको काम सुरु गरेको थियो । निर्माण सुरु गरेको केही दिनपछि भूमिले करिब पाँच महिना निर्माणको काम रोकेको थियो । त्यसपछि ठेकेदार बोहरा सम्पर्कविहीन भए । अहिले पवनकुमार महतो सञ्चालक रहेको भूमि कन्स्ट्रक्सनको पार्टनर रमणले निर्माणको काम सुरु गरेको छ । लामो समयसम्म निर्माण कार्य रोकिएको र निर्माण सम्पन्न नभएपछि पहिलो पटक म्याद थप गर्ने तयारी गरिएको सहरी विकास तथा भवन निर्माण विभाग सङ्घीय आयोजना कार्यान्वयन एकाइका प्रमुख सुरेन्द्रकुमार साहले बताए । ‘निर्माण कम्पनीले म्याद थपको लागि समयसीमा माग गर्ने तयारी गर्दैछ’ उनले भने, ‘म्याद सकिनुअगाडि पहिलो पटक म्याद थप गरिनेछ ।’

ठेकेदार कम्पनीले घाटा हुने भन्दै काममा ढिलासुस्ती गरेको बुझिएको छ । टेन्डर आह्वान गरेको भन्दा १७ करोड कम लागतमा ठेक्का पारेको सो जेबीले घाटा लाग्ने भन्दै काम गर्न ढिलासुस्ती गरेको निर्माण व्यवसायीहरू बताउँछन् ।

निर्माण कम्पनीले हालसम्म ६ करोड रुपैयाँभन्दा बढी रकम भुक्तानी लिइसकेको छ । भूमि र बीआईपीएलले  ५ करोड ६९ लाख ४४ हजार ८ सय ९३ रुपैयाँ ४७ पैसा र रमणले ८९ लाख ५५ हजार ७ सय ७५ रुपैयाँ भुक्तानी लिएको छ । निर्माण गरेअनुसारको भुक्तानी उनीहरूले लिएका छन् ।

कस्तो बन्नेछ नयाँ भवन ?
चार कठ्ठा २ धुर जमिनमा बन्ने भवनको पहिलो तलामा आकस्मिक कक्ष हुनेछ । अन्डरग्राउण्ड भवनको भूइँतलामा पार्किङ हुने स्टिमेटमा उल्लेख गरिएको छ । दोस्रो तलामा एचडियुसहितको डाइलाइसिसलगायतका सेवाहरु हुनेछन् । यस्तै तेस्रो तलामा नेफ्रोलोजी जनरलसहितको प्रतिक्षालय हुनेछ । तेस्रो तलामा ५० शय्याको हुनेछ । यसैगरी चौथो तलामा कार्डियो र न्यूरोको सेवा रहनेछ । चौथो तलामा ५० शय्याको हुनेछ । पहिलो चरणमा पाँच तलाको भवन बन्नेछ । त्यसपछि योजनाअनुसार तला थप हुँदै जानेछ । मास्टर प्लानअनुसार ७ तलाको बनाउने भवनको लागत स्टिमेटमा पाँचौं तलामा ५२ शय्याको जनरल वार्ड र छैठौं तलामा हेल्थ अफ डिपार्टमेन्ट बनाउने उल्लेख गरिएको छ । हाल ३ सय ५० शय्याको अस्पताल रहेको कोशीको सुविधासम्पन्न भवन बनेपछि पाँच सय शय्या पुर्याउने तयारी गरिएको छ ।

कमेन्ट गर्नुहोस्
सम्बन्धित

ढल्केवर । धनुषामा सडक दुर्घटनामा परी मंगलबार एक जना पत्रकारको मृत्यु भएको छ । धनुषाको मिथिला नगरपालिका–६ ढल्केवरमा मोटरसाइकल दुर्घटनामा परी २८ वर्षीय पत्रकार विनयकुमार यादवको मृत्यु भएको जिल्ला प्रहरी कार्यालय धनुषाले जनाएको छ । मंगलबार बिहान आफैँले चलाएको प्रदेश ०२–००६ प ३०३५ नम्बरकाे मोटरसाइकल ढल्केवर–जनकपुर सडकखण्डमा अनियन्त्रित भई सडक छेउको रेलिङमा ठोक्किएर पत्रकार यादव […]

काठमाडौँ । एक महिनादेखि मलद्वारमा बोतल बोकेर बाँचेका गोरखाका एक पुरुषको शल्यक्रिया गरेर बोतल निकालिएको छ। स्वास्थ्य निर्देशनालय गण्डकी प्रदेशका अनुसार गोरखा नगरपालिका–३ नरेश्वरका ५७ वर्षीय पुरुषको मलद्वारमा कीटनाशक औषधिको बोतल अड्किएको थियो। बोतल अड्किएर ठुलो आन्द्रा अवरुद्ध भएर त्यसको सङ्क्रमण शरीरमा फैलिँदै गएको अवस्थामा आइतबार बिहान उनको शल्यक्रिया गरिएको हो। सङ्क्रमण फैलिएको अवस्थामा गोरखा […]

काठमाडौं । एशियाका तीन मुलुक चीन, भारत र नेपाल तीनैवटाको राजधानी विश्वकै प्रदूषित शहरको शिर्ष ३ मा परेका छन् । एयर क्वालिटी इन्डेक्सका अनुसार आज चीनको राजधानी बेइजिङ सबैभन्दा प्रदूषित शहरको रुपमा मापन गरिएको छ । त्यस्तै, भारतको राजधानी दिल्ली दोस्रो प्रदूषित र नेपालको राजधानी काठमाडौं तेस्रो प्रदूषित रहेको पाइएको छ । प्रदूषित शहरहरुको सूचीको […]