तस्विर : नमो अनलाईन
सुनसरी । बर्जु गाउँपालिका वडा नं. ४ का आगलागी पिडितका लागि महिला, बालबालिका तथा ज्येष्ठ नागरिक मन्त्री भगबती चौधरीको पहलमा राहत सामग्री वितरण गरिएको छ । युएन वुमनको ‘द कमिसन अन दि स्टाटस अफ वुमन’ कार्यक्रममा भाग लिन अमेरिका पुग्नु भएको मन्त्री चौधरीको पहलमा नेपाल रेडक्रस सोसाइटीले आगलागी पिडित परिवारलाई राहत सामग्री वितरण गरेको हो ।
नेपाल रेडक्रस सोसाइटी सुनसरीले आगलागीबाट पिडित १६ घर परिवारका लागि आवश्यक राहत सामग्री वितरण गरेको रेडक्रस सुनसरी सभापति उमेश थापाले जानकारी दिए । आइतबार दिउसो ३ बजे बर्जु वडा नं. ४ स्थित जयनगर मुस्लिम टोलमा आगलागी हुँदा २७ घर जलेर नष्ट भएका छन् । आगलागीबाट १६ घर परिवारका ८५ जनाभन्दा बढी प्रभावित बनेका छन् ।
रेडक्रसले पिडित प्रति परिवारलाई ११ थान आवश्यक राहत सामग्री वितरण गरेको छ । वितरण गरिएको सामग्रीहरुमा कम्बल, बाल्टी, भाडा सेट, डोरी, झुल, म्याट, त्रिपाल, प्लेन कपडा लगायत रहेका छन् । राहत वितरण रेडक्रस सभापति थापा, कोशी प्रदेश सभा सदस्य रामदेव यादव, बर्जु गाउँपालिकाकी उपमेयर नितुकुमारी चौधरी लगायतले वितरण गरेका थिए ।
आफ्नो निर्वाचन क्षेत्रका जनता आगलागीबाट पिडित भएको खबर सुन्ने वित्तिकै महिला बालबालिका मन्त्री चौधरीले आफ्ना सचिबालयका सदस्यहरुलाई तत्काल राहत, पुर्नस्थापना र उद्दारकालागि सम्बन्धीत निकायहरुसँग समन्वय गर्न निर्देशन दिनुभएको थियो । सोही मुताविक मन्त्री चौधरीको सचिवालयले रेडक्रस, जिल्ला प्रशासन, स्थानीय तहसँग समन्वय गरी तत्काल राहत उपलब्ध गराउन पहल गरेका थिए ।
मन्त्री चौधरीको सचिवालयले पिडित परिवारलाई पुर्नस्थापनाका लागि विभिन्न संघ, संस्थाहरुसँग समन्वय भइरहेको समेत जानकारी दिएको छ । मन्त्री चौधरीको स्वदेश फर्किए सँगै पिडितहरुको पुर्नबास व्यवस्थापनमा अल्पकालिन र दिर्घकालिन योजना बनाइने बताइएको छ । उहाँ २१ मार्च स्वदेश फर्कने कार्यतालिका रहेको छ ।
स्थानीय बिसुनदेव पौदारको घरबाट सुरु भएको आगो बस्तीमा फैलिएको थियो । आगलागीबाट सबै घर पूर्णरुपमा जलेको सितागन्ज ईलाका प्रहरी कार्यालयका प्रहरी ईन्चाज प्रेम बहादुर राउतले जानकारी दिएका छन् । बस्तीमा भएको आगलागीलाई सितागन्ज ईलाका प्रहरी कार्यालयको टोली विराटनगरसहित विभिन्न पालिकाबाट पुगेका ६ वटा दमकलले आगलागी नियन्त्रणमा लिएको थियो ।
