तस्विर : ब्रहमदेव मेहता/नमो अनलाइन
हरिनगर । नेपाल लघुवित्त बैंकर्स संघ सुनसरीले शान्ति सुरक्षाको माग राख्दै सहायक प्रमुख जिल्ला अधिकारी मार्फत प्रधानमन्त्रीलाई ज्ञापनपत्र बुझाएको छ । नेपाल लघुवित्त बैंकर्स संघ सुनसरीका पदाधिकारीहरूले सुनसरीका साहयक प्रमुख जिल्ला अधिकारी माधव प्रसाद ढुंगानालाई ज्ञापन पत्र बुझाएका हुन् ।
पछिल्लो केही समयदेखि केही व्यक्ति तथा समूहले लघुवित्त विरुद्धको संघर्ष समिति नामको समूहमार्फत संस्थाहरूको कार्यालयमा ताल्चा लगाउने, कर्मचारीहरू माथि हातपात गर्ने, लघुवित्त कार्यक्रम बन्द गर्न लगाउने र विभिन्न धम्की दिएर कर्मचारीहरूको मनोबल गिराउने जस्ता अराजक गतिविधि भइरहेको जानकारी गराउँदै लघुवित्त बैंकर्स संघमा आबद्ध रहेका सुनसरीका ३१ वटा लघुवित्त संस्थाहरुका ९३ जना कर्मचारीहरूको उपस्थितिमा ज्ञापन पत्र बुझाएका छन् । संघले सुनसरी सहित देशका ७७ वटै जिल्लामा कर्मचारीहरूमार्फत ज्ञापन पत्र बुझाएका हुन्।
संघका पदाधिकारीले देशभर पछिल्लो समय घटेको घटनाले आम लघुवित्तकर्मी तथा नागरिकहरूमा त्रासको वातावरण सृजना भएको र त्यस्ता अराजक गतिविधिले देशको अर्थतन्त्रलाई नकारात्मक प्रभाव पारिरहेकोले त्यस्ता समूहका कार्यक्रमलाई बन्द गराई लघुवित्तकर्मीहरूलाई तत्काल शान्ति सुरक्षा कायम गर्न माग गर्दै सबै जिल्लाका जिल्ला प्रशासन कार्यालयबाट नै ज्ञापन पत्र बुझाइएको संघमा आबद्ध जीवन विकास लघुवित्त वित्तीय संस्थाको सुनसरी जिल्ला प्रमुख निराजन कुमार साहले जानकारी दिनुभयो।
