देवानगञ्ज । पारिस्थितिक सभ्यताको विषयवस्तुमा रहेको विश्वव्यापी मञ्च ‘इको फोरम ग्लोबल गुइयाङ २०२३’ आइतबार दक्षिणपश्चिम चीनको गुइझाउ प्रान्तको राजधानी गुइयाङमा सम्पन्न भएको छ । यस वर्षको फोरम ‘मानवता र प्रकृति बीचको सद्भावको आधुनिकीकरणलाई पछ्याउँदै–हरियो र कम कार्बन विकासलाई बढावा दिँदै’ भन्ने नारामा आयोजना गरिएको थियो ।
शनिबार र आइतबार सम्पन्न फोरममा चीनको मौसम प्रशासनले जलवायु परिवर्तन सम्बन्धी निलोपत्र जारी गरेको छ । जसले चीन, एसिया र विश्वभरका नयाँ जलवायु प्रवृत्तिहरूको विश्लेषण गर्दछ ।
फोरम मानिस र प्रकृतिबीचको सामञ्जस्यपूर्ण सहअस्तित्वको आधुनिकीकरण र हरित तथा न्यून कार्बन विकासलाई प्रवद्र्धन गर्ने विषयमा केन्द्रित रहेको नेपाली प्रतिनिधि मण्डलकी सदस्य सांसद भगबती चौधरीले जानकारी दिइन् ।
‘प्रकृति र मानिस विचको अन्तरद्वन्द्वलाई कम गरी दुवैको सहअस्तित्वलाई संरक्षण गर्न र हरित तथा न्यून कार्बन विकासमा फोरमले जोड दिएको छ । १४ वटा पर्यावरणीय सभ्यता निर्माण र हरित विकासमा ग्लोवल सहमति गरेको छ ।’ चौधरीले बताइन् । फोरममा नेपाली प्रतिनिधिमण्डलले उत्साहजनक रुपमा सहभागिता जनाएको चौधरीले जानकारी दिइन् ।
उक्त समारोहमा इन्टरनेशनल युनियन फर कन्जर्भेसन अफ नेचर (आइयुसिएन) ले आफ्नो हरित सूचीमा राखेका चीनका १३ वटा प्राकृतिक सम्पदाका लागि अवार्ड पनि दिएको थियो । फोरममा ४२ देश र क्षेत्रहरूबाट २५०० भन्दा बढी प्रतिनिधिहरु सहभागी थिए ।
‘इको फोरम ग्लोबल २०२३’ मा भाग लिन गएको नेपाली प्रतिनिधि मण्डलले गुइझउस्थित भूगर्भीय संग्रहालयको भ्रमण गरेको छ । उपसभामुख इन्दीरा राना नेतृत्वको टोलीले इको ग्लोवल फोरममा भाग लिँदै आइतबार उक्त संग्रहालयको समेत अवलोकन गरेको हो ।
भ्रमण दलमा पूर्वमन्त्री सांसद भगबती चौधरी, सांसदद्वय डा. चन्दा कार्की र मैना कार्की सहित संसद सचिवालयका उपसचिब बिमलराज जोशी छन् । टोलीले त्यहाँको राष्ट्रिय डाटा सेन्टर समेतको अवलोकन गरेको सांसद चौधरीले जानकारी दिइन् । उप–फोरम अन्तरगत ‘इम्प्लिमेन्टिङ ग्लोबल डेभलपमेन्ट पहल, हरियो र कम–कार्बन विकासको सुविधा दिने’ शीर्षकमा नेपाली प्रतिनिधि मण्डल औपचारिक पोशाकमा भाग लिएका थिए ।
फोरममा सहभागी हुँदै गर्दा नेपाली भ्रमण टोलीले चीनको प्राचिन शहर किङ्गयानको पनि भ्रमण गरेका थियो । प्रतिनिधिमण्डल आज स्वदेश फर्कँदैछ ।
