तस्विर : नमो अनलाईन
इलाम । बिदाबाहेक सधैंजसो अनिवार्य कार्यालयमा उपस्थित हुने धरान उपमहानरपालिकाका मेयर हर्क साम्पाङ मंगलबार भने कार्यालयमा थिएनन् ।
उनी इलाममा हुने चुनावी सभालाई सम्बोधन गर्न इलाम पुगेका छन् । उनले इलाम पुगेर इलाम २ मा डकेन्द्रसिं थेगिमलाई भोट गर्न अपिल गरेका छन् । मङ्गलबार यहाँ आयोजित चुनावी सभालाई सम्बोधन गर्दै साम्पाङले स्वतन्त्र उम्मेदवार थेगिमलाई भोट गर्न अपिल गरेका हुन् ।
उनले थेगिमको चुनाव चिह्न मुढामा मतदान गर्नु इतिहास लेखनमा जोडिनु भएको बताएका छन् । “मुढामा भोट गर्नुस् र इतिहास लेखनमा जोडिनुस् । इतिहास लेखनको एउटा अक्षर बन्नुस्,” साम्पाङले भने ।
अरु उम्मेदवारहरूले विभिन्न आश्वासन दिने उल्लेख गर्दै उनले भने, “यहाँ मासु, चिउरा, जागिर के-के हो के-के; धेरै आश्वासनहरू आउँछन् । तर, तपाईंहरू त्यसको पछि नलाग्नुस् । अरुको आसमा बाँच्नु पनि हुँदैन । स्वाभिमानी नेपाली अरुको आसमा बाँच्नुहुन्न । यो कुरा मनन गर्नुस् ।”
लोकतन्त्रमा सबैभन्दा ठूलो अधिकार मताधिकार भएको उनले बताए । “सबैसँग एउटै भोट हो । १० तलामाथि बस्नेको पनि त्यही एउटै भोट हो, भुइँमान्छेको पनि त्यही एउटै भोट हो । ५ वटा डिग्री भएको मान्छेसँग पनि हुने त्यही एउटा नै हो, साधारण नाम लेख्नेसँग हुने पनि त्यही एउटै हो । तपाईंहरूले आ-आफ्नो एउटा भोट सही ठाउँमा प्रयोग गर्नुस्,” उनले भने ।
वैशाख १५ मा इलाम २ मा हुने उपनिर्वाचनमा पहिचानवादीहरूको तर्फबाट स्वतन्त्ररूपमा थेगिमले उम्मेदवारी घोषणा गरेका छन् । त्यसबाहेक नेकपा (एमाले) का सुहाङ नेम्वाङ, राष्ट्रिय स्वतन्त्र पार्टी (रास्वपा) का मिलन लिम्बू, नेपाली कांग्रेसका डम्बरबहादुर खड्कालगायत अरु पनि प्रतिस्पर्धामा छन् ।
