तस्विर : नमो अनलाईन
सुनसरी । नेपाली मुस्लिम समाज सुनसरीले प्रधानमन्त्रि पुष्पकमल दाहाललाई ज्ञापन पत्र बुझाएका छन् । नेपाली मुस्लिम समाज सुनसरीका एक प्रतिनिधि मण्डलले विभिन्न माँग तथा ध्यानाकर्षण सहितको ज्ञापन पत्र जिल्ला प्रशासन कार्यालय सुनसरी मार्फत बुझाएको हो ।
सो ज्ञापन पत्रमा नेपाल बहुजातिय , बहुधार्मिक एवं बहुसाँस्कृतिले भरिएको देश हो । बहुजातिय , बहुभाषिक बहुधार्मिक , बहुसाँस्कृतिक तथा भौगोलिक विविधतायुक्त विशेषतालाई नेपालको संविधानसम्बोधन गरेको संवैधानिक अस्तित्व रहेको छ । हाम्रो विशिष्ट पहिचान भनेकै सामाजिक विविधता र सहअस्तितत्वको स्विकार्यता हो । हामी विचको पारस्परिक विश्वास ,एकता , भाइचारा र धार्मिक सहिष्णुतालाई अक्षुण राख्दै अघि बढि रहेको हाम्रो सामाजिक परिवेशलाई आघात पुर्याउने गरी हिन्दु धर्म सँग सम्बन्धित विभिन्न धार्मिक सँघ सँस्थाहरुको नामबाट अतिवादी गतिविधि भै रहेको सन्दर्भमा स्मरण गराउँदै ज्ञापन पत्रमार्फत अनुरोध गरेको छ ।
मुलुक एकीकरण समय भन्दा अगाडी देखि नै विभिन्न स्वरुपमा अस्तित्वमा रहेको इस्लाम धर्मावलम्बीहरुको बसोबास र अस्तित्वलाई नै संकटमा पार्ने गरी सामाजिक सद्भाव र धार्मीक सहिष्णुतालाई समेत आघात पुर्याउने गतिविधि भै रहेको छ । मुस्लिम समुदायको मुलुक र मुलुकीका लागि गरिएको विभिन्न क्षेत्रमा रहेको योगदान र उच्च सामाजिक छविलाई समेत धमिल्याउने प्रयत्न भै रहेको छ । आज समयमै सचेत हुन नसके अमुक धार्मीक अतिवादी संघसँस्थाको गलत गतिविधिको कारण भोली मुलुकले अत्यन्त खतरनाक स्थितिको सामना गर्नु पर्ने अवस्था आउन सक्छ भन्दै नेपाल सरकारको ध्यानाकर्षण गराएको छ ।
नेपालको संवैधानिक अंगको उच्च तहमा पुगेका मानिस कमल नारायण दास, हरिनगर ३ गौतमपुर निवासी जीवन मेहता लगायतले आफनो सामाजिक सञ्जालमा पोष्ट गरेको लेखले मुस्लिम धार्मिक सहिष्णुता माथि आघात पुर्याउने प्रयत्न गरेको छ , यस्तै गलत संदेशबाट उत्प्रेरित भै अतिवादी धार्मिक संघ सँस्थाहरुमा आवद्ध व्यक्तिहरुबाट यस सुनसरी जिल्लाको हरिनगर गाउँपालिका र यस क्षेत्रमा बसोबास गर्ने इस्लाम धर्मावलम्बीहरु माथि भएको लुटपात हुल दंगा , रोजाको समयमा भएका आगजनि ,एवम् धर्म प्रति फैलाएको अनर्गल प्रचार प्रसारका कारण सामाजिक सद्भाव भड्काई वातावरण उत्तेजित पारीएको छ । पालिकामा तोडफोड भै ठुलो क्षति भएको छ । चक्का जाम , हड्ताल, कुटपिट, लुटपाट, कफर्यु लगायतका कामले गर्दा सामाजिक जीवन सहज छैन , आतंकीत वातावरणमा दैनिक जीवन असहज बन्दै गै रहेको छ ।
यस्ता गतिविधिले भोलि हुन सक्ने अन्य मुलुक र धर्म विरोधी गतिविधिले मुलुकलाई धर्म युद्ध र गृह युद्धमा समेत लग्न सक्ने नकारात्मक संकेत दखिन थालेको हुँदा तत्कालै यसको अन्त्य गरी भै रहेका गतिविधिमा संलग्नहरुको छानविन गरी उक्त घटनामा विना कारण असंलग्न मानिस दिलसाद सिद्धिकि उपर लगाइएको गलत अभियोग खारेज गरी निजलाई रिहाई गर्दै यस्तो निन्दनिय घटनामा संलग्नहरुको छानविन गरी दोषि माथि विद्यमान कानुन अनुसार कार्वाही गरी पाउँ भन्दै नेपाल सरकारसँग अनुरोध गरिएको ज्ञापन पत्रमा उल्लेख छ ।
गृह मन्त्रालयलाई समेत वोर्धाथ गरि नेपाली मुस्लिम समाज सुनसरीका अध्यक्ष नइम अन्सारी , सचिव अक्रम अलि र प्रवक्ता मौलाना सहाबुद्दिन इस्लाहीद्धारा हस्ताक्षरीत सो ज्ञापनपत्र बुझाएका छन् । यसै गरि सुनसरी जिल्लामा कार्यरत विभिन्न मुस्लिम संघसंस्थाका धार्मिक गुरुहरुको नेतृत्वमा मुस्लिम समाज सुनसरीको तर्फबाट पनि जिल्ला प्रशासन मार्फत प्रधानमन्त्रि र गृहमन्त्रिलाई ज्ञापनपत्र बुझाएका छन् ।
