तस्विर : नमो अनलाईन
विराटनगर । कोशी प्रदेश स्थित विराटनगर–९ मा रहेको मिथिला कन्सल्टेन्सीका व्यवस्थापक सुभम साहमाथि कुटपिट भएको छ । कोवास कलेजका प्रिन्सिपल सुनिल श्रेष्ठसहित चार जनाको समूहले सोमवार कार्यकक्षभित्र प्रवेश गरेर २७ वर्षीय साहमाथि कुटपिट गरेको हो ।
आफूमाथि श्रेष्ठसहित कलेजका बाउन्सर र सुरक्षागार्डले निर्घात कुटपिट गरेको साहले बताए । प्रिन्सिपल श्रेष्ठले म्यानेजर साहलाई कुटपिट गरेको सिसि टिभिको भिडियो पनि सार्वजनिक भएको छ । श्रेष्ठसहित चारजना साहको कार्यकक्षमा प्रवेश गरेर कुटपिट गरेको भिडियोमा देखिन्छ । केहीबेर भनाभनपछि उनीमाथि मुक्का प्रहार गरेको भिडियोमा प्रष्ट देख्न सकिन्छ । मदिरा सेवन गरेर आएका श्रेष्ठले अपशब्द बोल्दै कुटपिट गरेको म्यानेजर साहले बताए ।
मिथिला कन्सल्टेन्सी कोवास कलेज परिसरबाट हटाउनुपर्ने भन्दै श्रेष्ठले आफूलाई कुटपिट गरेको पीडित साहले बताए । उक्त कन्सल्टेन्सी कोवास कलेज परिसरमा दुईवटा कोठा भाडामा लिएर विगत पाँच वर्षदेखि सञ्चालित छ । कुटपिटपछि जिल्ला प्रहरी कार्यालय, मोरङमा उजुरी दिन गएपनि प्रहरीले उजुरी दर्ता नगरेको साहको आरोप छ ।
यसका बीच प्रहरीले कुटपिटमा संलग्न प्रिन्सिपल श्रेष्ठसहित चार जनालाई नियन्त्रणमा लिएको छ । मोरङ प्रहरी प्रवक्ता डीएसपी ज्ञानेन्द्रबहादुर बस्नेतले चार जनालाई नियन्त्रणमा लिएर अनुसन्धान गरिरहेको बताए । कुटपिट गर्नेहरूविरुद्ध हालसम्म जाहेरी नपरेको उनले दाबी गरे । । ‘जाहेरी आएको छैन,’ उनले भने ‘मंगलवार मात्रै थाहा हुन्छ । उहाँहरू मिल्नु हुन्छ कि, जाहेरी दिनुहुन्छ ।’
उनका अनुसार श्रेष्ठलाई अहिले वडा प्रहरी कार्यालय विराटनगर ‘क’मा राखिएको छ ।
प्रिन्सिपल श्रेष्ठलाई पावर लगाएर हाजिरी जमानतमा छुटाउन नेता लागिपरेको पीडित साह पक्षको आरोप छ ।
