विराटनगर । विराटनगर विमानस्थलको नयाँ टर्मिनल भवन निर्माण कार्य यति बेला धमाधम भइरहेको छ ।
नयाँ टर्मिनल भवनको भौतिक कार्य १५ महिनाको अवधिमा झण्डै ३८ प्रतिशत निर्माण कार्य सम्पन्न भएको ठेक्का लिएको निर्माण कम्पनीले जनाएको छ ।
त्यसैगरी आर्थिक प्रगतीमा ३१ प्रतिशत सम्पन्न भई सम्झौता भएको मिति अगावै हस्तान्तरण गर्ने गरी काम भईरहेको निर्माण कम्पनीले जनाएको छ । ३ वर्षभित्र टर्मिनल भवन निर्माण सम्पन्न गर्ने गरी केसी डाफे जेभीले नागरिक उड्डयन प्राधिकरणसँग सम्झौता गरेको थियो । केसी डाफे जेभीले २०७९ मंसिर ११ गते सम्झौता गरे पनि केही महिनापछि मात्र काम सुरु गरेको थियो । तत्कालिन संस्कृति, पर्यटन तथा नागरिक उड्डयनमन्त्री सुदन किरातीले २०७९ फागुन १ गते टर्मिनल भवनको शिलान्यास गरेका थिए । शिलान्यासपछि विमानस्थलका पार्किङ ,होटल रेष्टुरेन्ट लगायतका भवनहरु सार्नुपर्ने भएकाले काम सुचारु गर्नको लागी केही समय लागेको थियो ।
३ अर्व १२ करोड रुपैयाँ लागतमा बन्न लागेको अत्याधुनिक टर्मिनल भवन कोशी प्रदेशको लागी एक नमुनाको रुपमा रहने आशा लिएको छ ।
भवन बनिसकेपछि त्रिभुवन अन्तराष्ट्रिय विमानस्थल, पोखरा, भैरहवाको जस्तै सुविधा सम्प्पन्न अन्तराष्ट्रिय स्तरको नयाँ टर्मिनल भवन बन्ने केशी डाफे जेभीका प्रोजेक्ट मेनेजर रमेश पौडेलले बताउनुभयो ।
विराटनगरको नयाँ टर्मिनल भवनबाट राष्ट्रिय तथा अन्तराष्ट्रिय उडान हुने सम्मको लागी काम थालनी भईरहेको पौडेलले आवर विराटनगरलाई जानकारी दिनुभयो । टर्मिनल भवन निर्माण सम्पन्न भईसकेपछि पुर्वको एउटा गौरवपुर्ण योजना मान्नुपर्छ । नागरिक उड्डयन प्राधिकरणले कोशी प्रदेशको राजधानी विराटनगकरमा बनाउन लागेको यो एउटा गौरवपुर्ण योजनाले भने पक्कै पनि विकासको एउटा छाप छाड्ने देखिन्छ ।
