तस्विर : नमो अनलाइन
काठमाडौँ । बंगलादेशमा पछिल्लो समय हिन्दुमाथि भइरहेको दुर्व्यवहारप्रति नेपालका हिन्दुवादी संघसंस्था तथा सरोकारवालाले चिन्ता व्यक्त गरेका छन् ।
नेपाली कांग्रेसका केन्द्रीय सदस्य एवं प्रतिनिधि सभा सदस्य शंकर भण्डारीले बंगलादेशमा अल्पसङ्ख्यक हिन्दु तथा बौद्ध धर्मालम्बीमाथि भएको दमन मानवताविरोधी कार्य रहेको बताएका छन् ।
सांसद भण्डारीले बिहीबार विज्ञप्ति जारी गर्दै बंगलादेशमा रहेका हिन्दु तथा बौद्ध धर्मावलम्बीमाथि भएको हत्या, आक्रमण, आगजनी तथा सिर्जना गरिएको त्रासदी मानवता विरोधी रहेको भन्दै त्यस्ता घटनालाई तत्कालन रोक्न आग्रह गरे ।
बंगलादेशमा धर्म र नश्ल पहिचान गरी गरिएको आक्रमण रोक्न पर्याप्त कूटनैतिक पहल थाल्न पनि सरकारलाई उनले आग्रह गरेका छन् ।
बिहीबार राष्ट्रिय एकता अभियानले बंगलादेशमा भइरहेको आन्दोलनको बारेमा विभिन्न हिन्दुवादी संघ संस्थासँग छलफल गरेको छ ।
छलफलमा प्रतिनिधि सभा सदस्य किरण साह, परराष्ट्र विज्ञ अरुण सुवेदी, नेपाल सनातन धर्म संस्कृति संगठनका पुष्पराज पुरुष, विश्व हिन्दु महासंघका अर्जुन बास्तोला, इस्कॉनका शैलेन्द्र प्रभुजी, श्री कृष्ण प्रणामी सेवा समितिका श्याम कृष्ण शर्मा, धार्मिक अभियन्ता खेमनाथ आचार्य, विश्व हिन्दु महासंघ राष्ट्रिय समितिका महासचिव रामचन्द्र तिवारीलगायतको सहभागिता थियो ।
पीडामा रहेका बंगलादेशी हिन्दु तथा बौद्ध धर्मावलम्बीहरूलाई नेपालमा शरण दिन नेपाल सरकारलाई आग्रह गर्ने निर्णय सो बैठकले गरेको अभियानका संयोजक विनय यादवले बताए ।
त्यस्तै परराष्ट्र मन्त्रालयमार्फत बंगलादेशलाई हिन्दुु र बौद्ध धर्मावलम्बीमाथि दमन रोक्न कूटनीतिक नोट पठाउन आग्रह गर्ने निर्णय समेत गरेको छ ।
हिन्दुमाथि भइरहेको दमन रोक्नका लागि पहल गर्न नेपालस्थित बंगलादेशको राजदूतावासलाई दबाब दिने निर्णय भएको उनले बताए ।
त्यस्तै बिहीबार हिन्दु राष्ट्र स्वाभिमान जागरण अभियानले पनि बंगलादेशमा रहेका हिन्दुमाथि भइरहेको दमनको बारेमा सरोकारवालासँग छलफल कार्यक्रम राखेको छ । यो अभियानले पनि विभिन्न हिन्दु संघसंस्थाका अधिकारीसँग छलफल गरी निष्कर्ष निकालिने बताएको छ ।
