तस्विर : जुगेस दास
देवानगञ्ज । सुनसरी स्थित देवानगञ्ज गाउँपालिकामा आजदेखि ट्राफिक चेकिङ पोस्ट स्थापना गरी सवारी चालक अनुमतिपत्र (लाईसेन्स), सवारी दर्ता प्रमाणपत्र (ब्लुबुक), र हेलमेट नभएकाहरूमाथि कडा कारवाही थालिएको छ। पुरानो इलाका प्रहरी कार्यालय अगाडि र कार्यालय पछाडि दुबै बाटोमा चेक पोस्ट राखी ट्राफिक चेकजाँच गरिँदै आएको छ।
इलाका प्रहरी कार्यालयका प्रहरी निरीक्षक कमल बिष्टको नेतृत्वमा आजबाट लागू गरिएको यो अभियानको उद्देश्य सवारी दुर्घटना न्युनिकरण गर्नु र अवैध सवारी साधन चोरीजस्ता अपराधलाई नियन्त्रण गर्नु रहेको छ।
प्रहरी निरीक्षक बिष्टका अनुसार पछिल्लो समय दुर्घटनाको दर बढ्दै गएको र सवारी साधन चोरीका घटनाहरू बढ्न थालेपछि यो कदम चालिएको हो। “सवारी साधनलाई व्यवस्थित बनाउन र सडक सुरक्षालाई सुनिश्चित गर्न हामीले यो विशेष चेकिङ अभियान सुरु गरेका छौं,” बिष्टले बताए।
चेकजाँचका क्रममा नियम उल्लंघन गर्नेहरूलाई उचित कारवाही गरिने र सवारी नियम पालना गर्न सबैलाई अपिल गरिएको छ। यस कदमले दुर्घटनाको दर घटाउन र सडक सुरक्षा सुधार गर्न सकारात्मक योगदान पुर्याउने विश्वास व्यक्त गरिएको छ।
