तस्विर : नमो अनलाईन
सुनसरी । देवानगञ्जकाका किसानलाई अनुदानमा गहुँको बिउ वितरण सुरु गरिएको छ ।
पालिकाको वार्षिक स्वीकृत कार्यक्रम अनुसार बिहीबारबाट ५० प्रतिशत अनुदानमा गहुँको बिउ वितरण सुरु भएको हो ।
गाउँपालिकाले गत वर्ष पनि गहुँको बिउमा ५० प्रतिशत अनुदान दिएको थियो । किसानलाई प्रोत्साहन गर्दै कृषि उत्पादकत्व वृद्धि गर्ने नीतिअनुसार गहुँको बिउमा अनुदान दिइएको पालिका प्रमुख बेचनप्रसाद मेहताले बताउनुभयो ।
वडा अनुसार गहँको कोटा निर्धारण गरी किसानबाट माग परिमाण संकलन गरेर कृषि सेवा शाखा मार्फत् बिउ वितरण गरिएको हो । गाउँपालिकाले यसअघि सूचना जारी गरी आफूलाई चाहिने गहुँको बिउको विवरण वडा कार्यालयमा टिपाउन किसानलाई जानकारी गराएको थियो ।
गाउँपालिकाले एनएल ९६१ जातको उन्नत गहुँको बिउ उपलब्ध गराएको हो । बिहीबार गाउँपालिका परिषरमा कृषि सेवा शाखाले एक कार्यक्रमको आयोजना गर्दै गाउँपालिका प्रमुख बेचनप्रसाद मेहता, उपाध्यक्ष कुमारी बिभा यादव, प्रमुख प्रसाशकीय अधिकृत सुधिर साफि, वडा नं. ६ का वडा अध्यक्ष हरिनन्दन मेहताले किसानहरुलाई एक÷एक बोरा बिउ उपलब्ध गराएर वितरण कार्य सुरु गरेका थिए ।
गहुँको बिउ वितरणको व्यवस्थापन कृषि सेवा शाखा र सिनुवारी महिला कृषि सहकारी संस्था लि. को सहकार्यमा भएको छ । कृर्षकहरुबाट माग भएर आए अनुसार यस वर्ष २७९ बोरा गहुँको बिउ वितरण गरिने योजना रहेको कृषि सेवा शाखाकी कृषि स्नातक अधिकृत निसा मेहताले जानकारी दिइन् ।
देवानगञ्जमा गहुँको उत्पादन बढी हुने गरेको छ । गत वर्ष अनुदानमा उन्नत जातको बिउ दिएका कारण गहुँ उत्पादन २० प्रतिशतले बढेको कृषि विज्ञहरुको भनाई छ।
