देवानगञ्ज । कोशी प्रदेश स्थिति सुनसरीको देवानगञ्ज गाउँपालिका २ नम्बर वडा कार्यलयले वडा भित्र रहेको मठ, मन्दिर, मस्जिद र मदरसालाई व्यवस्थित गर्न दर्ता नविकरण भए/नभएको लगायत उक्त मठ, मन्दिर, मस्जिद, मदरसाहरुको नाममा रहेको चल अचल सम्पत्तिको विवरण एक महिना भित्र बुझाउन सुचना जारी गर्दै माग गरेको छ ।
वडा कार्यालयमा यकिन विवरण न हुँदा मनोमानी रुपमा स्थानीयहरुले मठ मन्दिर तथा मस्जिदहरुको सम्पत्ति व्यक्तिगत लाभको लागि प्रयोग गर्दै आइरहेको छ। वडा भित्र रहेको मठ मन्दिर तथा मस्जिद व्यवस्थित नभएकोले सरकारी निकायबाट दिने सेवा सुविधा गलत नियतले सिमित व्यक्तिहरु निजी स्वार्थको लागि प्रयोग गरिरहेको चौतर्फी गुणासोको आधारमा उक्त निर्णय गरिएको वडाअध्यक्ष जघनारायण मेहताको भनाई रहेको छ ।
उक्त समय सिमा भित्र विवरण नबुझाएको खण्डमा वडा कार्यालयबाट प्रदान गरिने सेवा सुविधा र विनियोजित बजेट समेत रोक्का गरिने चेतावनी समेत दिएको छ।
“उपरोक्त सम्बन्धमा देवानगञ्ज गाउँपालिका २ नं वडा कार्यालयको मिति २०८०/०५/ १९ गते बसेको बैठकको निर्णय अनुसार २ नं वडा अन्तर्गत धार्मिक मण्ठ मन्दिर
तथा मस्जिद दर्ता र नवीकरण, चल अचल श्री सम्पति विवरण खुलाई सार्वजनिक गर्ने नगरेमा वडा कार्यालयबाट प्रदान गरिने सेवा सुविधा, विनियोजित बजेट समेत रोक्का हुने १ (एक) महिना भित्र दर्ता र नवीकरण गर्नको लागि यो सुचना प्रकाशित गरीएको व्यहोरा ” जारी गरेको सुचनामा उल्लेख छ ।
