हरिनगर । इटहरी उपमहानगरपालिकाले विद्यालय क्षेत्र आसपास सुर्तीजन्य पदार्थ बिक्री वितरणमा रोक लगाएको छ । बालबालिकालाई कुलत तथा दुर्व्यसनीमा पर्न नदिने उद्देश्यले विद्यालय क्षेत्रमा कडाइका साथ अनुगमन गरी रोक लागाईएको हो ।
सुर्तीजन्य र मादक पदार्थ बिक्री वितरण गर्नेलाई कारबाही गर्ने चेतावनी दिदै उपमहानगरपालिकाले बुधवार ठुलो मात्रामा सुर्तीजन्य पदार्थ जफत समेत गरेको छ ।
मेयर हेमकर्ण पौडेलले विद्यार्थीहरूलाई सुर्तीजन्य र मादक पदार्थको लतबाट टाढै राख्नका लागि उक्त अभियानको थालनी गरेको बताएका छन् ।
विद्यालयकै अगाडि खुलेआम सुर्तीजन्य र मादक पदार्थको बिक्री वितरण हुन थालेको गुनासो बढेपछि कडाइ गरिएको उनको भनाइ छ ।
आगामी दिनमा अटेर गरी मदिरा तथा सुर्तीजन्य पदार्थ बिक्री वितरण गर्नेलाई कानुनी दायरामा ल्याइने उनले चेतावनी दिएका छन् ।
