ईनरुवा । सार्वजनिक कार्यक्रमबाटै धार्मिक द्वन्द फैलाउने खालका उत्तेजक अभिव्यक्ति दिने धर्मगुरु आचार्य श्रीनिवास पक्राउ परेका छन् । उनलाई प्रहरीले सुनसरीको चक्रघट्टीबाट नियन्त्रणमा लिएको हो ।
उनले केही दिन अगाडि धार्मिक तथा साम्प्रदायिक द्वन्द भड्काउने खालको अभिव्यक्ति दिएका कारण पक्राउ गरिएको प्रहरीले जनाएको छ । सार्वजनिक स्थलमा हतियारसमेत प्रदर्शन गर्दै बोलेका उनले गाइ काटेका कसैलाई देखेमा खुकुरी लगेर काट्न भनेको थिए ।
त्यसरी मान्छे काटे वापत जेल परेमा दश वर्षसम्म पाल्ने भनाइ उनको थियो । भिख मागेर भए पनि त्यस्ता व्यक्तिका परिवार र बालबच्चासमेत आफूले पाल्ने उनले दाबी गरेका थिए । गाइ काट्नेको गला काट्न भन्दै उनले बोल्दा भीडले हुटिङ गरेको थियो । उक्त भिडियो सामाजिक सञ्जालमा भाइरल भएको थियो ।
