सुनसरी। इनरुवा नगरपालिका–६ का वडाध्यक्ष सुमन थापाविरुद्ध प्रहरीले पक्राउ पुर्जी जारी गरेको छ।
सुनसरी जिल्ला अदालतले एक युवतीको शरीर अंगभंग गरेको आरोपमा थापाविरुद्ध दर्ता भएको फौजदारी मुद्दाको अनुमतिपछि यो पक्राउ पुर्जी जारी भएको हो।
गत फागुन २२ गते साँझ चतराबाट कान्छीचोकतर्फ आउँदै गर्दा थापाले चलाएको कारले एक मोटरसाइकललाई ठक्कर दिएको थियो । ठक्कर दिनासाथ वडाध्यक्ष थापा घटनास्थलबाट फरार भएका थिए ।
मोटरसाइकलको पछाडि सवार देविका खनालको दाहिने खुट्टामा गम्भीर चोट लागेको थियो । मोटरसाइकल चालक राजकुमार पौडेल सामान्य घाइते भएका थिए । पटक पटकको अपरेशनका बाबजुद उनी हाल अशक्त अवस्थामा छिन्।
पीडितले प्रहरीमा उजुरी दिन खोज्दा दर्ता नगरेको र उपचार गरिदिनका लागि पीडक थापा सम्पर्कमा नआएपछि पीडित विराटनगर उच्च अदालत पुगेकी थिइन् । उच्च अदालतले भदौ ३ गते जिल्ला सरकारी वकिल कार्यालयलाई कारणसहित जवाफ दिन आदेश दिएपछि मात्र थापाविरुद्ध प्रहरीले मुद्दा दर्ता गरेको हो ।
अदातलले रिट दर्ता गरेपछि जिल्ला सरकारी वकिल कार्यालयलाई कारबाहीको आदेश दिएलगत्तै गत साउन १६ गते मुद्दा दर्ता भई साउन २० गते थापाविरुद्ध पक्राउ पुर्जी जारी भएको ।
सार्वजनिक पदधारीविरुद्ध मुद्दा दर्ता भएपछि स्वतः निलम्बन हुने व्यवस्था रहेपनि वडाध्यक्ष थापाले भदौ ८ गतेसम्म कार्यालयमै बसेर कामकाज गरेको पाइएको छ। भदौ ९ गतेदेखि फरार उनले त्यसअघि नै वडा सदस्य कृष्णकुमार श्रेष्ठलाई कार्यवाहक तोकेर गएका छन् ।
फरार अवस्थामा रहेका थापाले उपप्रधानमन्त्री प्रकाशमान श्रेष्ठ र गृहमन्त्री रमेश लेखकलाई भेटेर आफूविरुद्धको कारबाही रोक्न अनुरोध गरिरहेको पाइएको छ ।
