तस्विर : नमो अनलाइन
बर्जु । नेपाल शिक्षक महासङ्घ राष्ट्रिय समितिको आह्वानमा शुक्रबार देशभरका ७५३ वटै स्थानीय तहमा एकैसाथ आयोजित २ घण्टे धर्ना तथा ध्यानाकर्षण कार्यक्रम अन्तर्गत सुनसरीको बर्जु गाउँपालिकामा समेत धर्ना कार्यक्रम सम्पन्न गरिएको छ।
कार्यक्रम अन्त्यमा नेपाल शिक्षक महासङ्घ बर्जु कार्यसमितिले पालिकाका प्रमुख प्रशासकीय अधिकृत रविन्द्र महतलाई ध्यानाकर्षण पत्र बुझाएको हो।
बर्जु गाउँपालिकामा सम्पन्न धर्ना कार्यक्रममा विभिन्न शिक्षक संगठनका अगुवाहरूको उपस्थिति रहेको थियो। कार्यक्रमलाई सम्बोधन गर्ने क्रममा नेपाल शिक्षक महासङ्घ बर्जु अध्यक्ष विजय कुमार चौधरी, नेपाल शिक्षक सङ्घ बर्जु अध्यक्ष विनोद गुरुङ, नेपाल राष्ट्रिय शिक्षण संगठनका अध्यक्ष युवराज श्रेष्ठ, संघीय शिक्षक फोरम नेपाल अध्यक्ष रामानन्द मेहता, विद्यालय कर्मचारी परिषद बर्जु अध्यक्ष बाबुराम राय, बाल विकास शिक्षक कार्यसमिति अध्यक्ष सावित्री कर्ण र प्रधानाध्यापक संघ संयोजक पुनितलाल चौधरी लगायतका वक्ताहरूले शिक्षकका हकहित, पेशागत मर्यादा, सेवा सुरक्षा र शिक्षाको गुणस्तरबारे धारणा व्यक्त गरेका थिए।
धर्नामा बर्जु गाउँपालिकाभित्र रहेका २७ सामुदायिक विद्यालयका प्रधानाध्यापक तथा शिक्षकहरूको उल्लेख्य सहभागिता रहेको थियो। सहभागीहरूले नेपाल शिक्षक महासङ्घ राष्ट्रिय समितिले अघि सारेका मागहरूलाई समर्थन गर्दै शीघ्र कार्यान्वयन गर्न सरकार तथा सम्बन्धित निकायलाई आग्रह गरे।
माग र पृष्ठभूमि शिक्षक संगठनहरूले हालै सरकारले ल्याउन खोजेको शिक्षा ऐनका प्रावधान, शिक्षकको सेवा–सुविधा, स्थायीकरण प्रक्रिया, सम्मानजनक तलब–भत्ता, बढुवा र पेशागत हकहित सुनिश्चित गर्नुपर्ने माग राख्दै देशव्यापी दबाब कार्यक्रम सञ्चालन गरिरहेका छन्।
यही सन्दर्भमा बर्जुमा आयोजित धर्ना कार्यक्रममा सहभागी शिक्षकहरूले शान्तिपूर्ण ढंगले आफ्ना माग प्रस्तुत गर्दै ध्यानाकर्षण पत्र बुझाएका थिए। नेपाल शिक्षक महासङ्घका अनुसार माग पूरा नभएसम्म चरणबद्ध आन्दोलनलाई निरन्तरता दिने तयारी गरिएको छ।
