विराटनगर । विराटनगरको महेन्द्र चोकमा जेठ ३० गते राजा महेन्द्रको सालिक स्थापना गर्ने घोषणा गरिएको छ ।
त्यहाँ रहेको पूर्वराजा महेन्द्र शाहको सालिक जनआन्दोलनका क्रममा भत्काएर फ्याँकिएको थियो । चोकको नाम जनआन्दोलन चोक राखिएको थियो ।
सनातन युवा मंच नामक संस्थाले बिहीबार सालिक स्थापना गर्ने विषयमा पत्रकार सम्मेलन आयोजना गरी महेन्द्र जन्मोत्सवका दिन सालिक राखिने मंचका अध्यक्ष नवराज ढकालले जानकारी दिए ।
नेपालबाट राजसंस्था अन्त्य भएको लामो समयपछि विराटनगरमा पुनः सालिक राख्ने विषयमा विराटनगरमा पहल थालिएको हो । अध्यक्ष ढकालले सालिक १० लाख रुपैयाँ लगानीमा निर्माण गरिने बताए । उनले भने,”सर्वसाधारणलाई एक रुपैयाँ सहयोग गर्न अपिल गरेका छौं ।”
विभिन्न आन्दोलनका क्रममा देशभर विभिन्न सालिकहरु भत्काइएको थियो । जेनजी आन्दोलनका क्रममा देशका विभिन्न भागबाट राजनीतिक र अन्य क्षेत्रका व्यक्तित्वको सालिक भत्काइएको थियो ।
मधेश आन्दोलनका क्रममा पनि यस्ता कृयाकलाप भएका थिए ।
विराटनगरमा महेन्द्रको सालिक भत्काएपछि राष्ट्रिय प्रजातन्त्र पार्टीका कार्यकर्ताले भित्तामा महेन्द्रको फोटो टाँसेर उनको स्मृति दिवस मनाउने गरेका थिए । अहिले त्यहाँ राष्ट्रिय झन्डा राखिएको छ ।
