फाईल
विराटनगर । मोरङ र सुनसरी जिल्लामा विद्युत् ट्रान्सफर्मर चोरी गर्दै आएका गिरोहका पाँचजनालाई प्रहरीले पक्राउ गरेको छ ।
जिल्ला प्रहरी कार्यालय मोरङ र प्रदेश प्रहरी कार्यालय कोसीबाट खटिएको संयुक्त टोलीले उनीहरूलाई नियन्त्रणमा लिएको हो ।
मोरङ प्रहरी प्रमुख एसपी नारायण चिमरीयाका अनुसार, पक्राउ परेकाहरूको प्रारम्भिक अनुसन्धानबाट उनीहरू हालसम्मको ट्रान्सफर्मर चोरीमा संलग्न रहेको खुलेको छ ।
यो गिरोहले पछिल्लो एक वर्षको अवधिमा मोरङ, झापा र सुनसरीमा गरी कुल २२ वटा ट्रान्सफर्मर चोरी गरेको प्रहरीले बताएको छ ।
तीमध्ये सबैभन्दा बढी १२ वटा ट्रान्सफर्मर सुनसरीबाट, आठवटा मोरङबाट र दुईवटा झापाबाट चोरी भएका थिए ।
नेपाल विद्युत् प्राधिकरण कोसी प्रदेशका प्रमुख राजीव सिंहका अनुसार, चोरहरूले विशेषगरी ग्रामीण क्षेत्रका सिँचाइ तथा खानेपानीका लागि प्रयोग हुने ट्रान्सफर्मर लक्षित गरेका थिए ।
११ हजार भोल्टको लाइन सर्ट गराएर ट्रान्सफर्मर खसाल्ने र तामाको क्वाइल निकाल्ने गरेका थिए । पछिल्लो पटक सुनसरीको देवानगञ्जबाट ट्रान्सफर्मर चोरी भएको थियो ।
पटक पटकको चोरीका घटनाले प्राधिकरणलाई करिब दुई करोड २० लाख रुपैयाँभन्दा बढीको आर्थिक क्षति पुर्याएको जनाइएको छ । प्रहरीले घटनाबारे थप अनुसन्धान जारी राखेको छ ।
